Mazmuny
EAS - etekkir aldy sındromy degenimiz ne?
EAS paıda bolýynyń sebepteri qandaı?
Antıdepressanttar kómektese alady ma?
Uryqtanýǵa qarsy preparattardy qabyldaý kómektesedi me?
EAS emdeý úshin qandaı preparattardy retseptsiz satyp alýǵa bolady?
Sımptomdardy qalaı jeńildetýge bolady?
Dárýmender men taǵamdyq qospalar jóninde ne aıtýǵa bolady?
EAS - etekkir aldy sındromy degenimiz ne?
Etekkir aldy sındromy (EAS) – bul etekkir bastalýyna deıin 14 kúndeı buryn seziletin sımptomdar toby. Sımptomdar, ádette, etekkir bastalǵannan keıin joıylady.
Áıelderdiń kópshiligi etekkir aldynda jeńil jaısyzdyq sezinedi. Biraq, EAS kezinde ashýshańdyq, depressııa nemese jaısyzdyq sezilýi múmkin, olarmen úıde nemese jumysta otyrǵanda kúresýge týra keledi. EAS keıbir sımptomdary tómende keltirilgen. Ár aılarda sımptomdar nasharlaýy nemese jaqsarýy da múmkin.
· Teride bezeýlerdiń paıda bolýy nemese taralýy
· Arqadaǵy aýyrsyný
· Ishtiń kebýi
· Tábettiń ózgerýi, onyń ishinde, belgili bir ónimderge tartymdyq
· Ish qatýy
· Jylaýqorlyq
· Depressııa
· Júrek soǵýynyń jıileýi
· Ashýshańdyq, shıryǵý nemese úreılený
· Sharshaý sezimi
· Bas aýyrýy
· Ysyný
· Býyndaǵy aýyrsyný
· Kóńil-kúıdiń qubylysy
· Jynystyq ómirge qulyqsyzdyq
· Emshektiń sezimtaldyǵy men isinýi
· Nazar qoıýdaǵy máseleler
· Uıqydaǵy máseleler
· Qoldyń nemese aıaqtyń isinýi
· Jalǵyz qalǵysy kelý
· Salmaqtyń artýy
EAS paıda bolýynyń sebepteri qandaı?
EAS paıda bolý sebepteri jetkilikti zerttelmegen. Eń yqtımaly: sımptomdardyń paıda bolýy etekkir aınalymy barysyndaǵy gormondar deńgeıiniń ózgerisimen baılanysty. EAS psıhologııalyq máselelerge nemese kúızeliske baılanysty týyndamaıdy, biraq, olar sımptomdardy nasharlatýy múmkin.
Dáriger sımptomdardy kúntizbe boıynsha qadaǵalaýdy suraıdy. Eger sımptomdar birneshe aı boıy belgili bir kezeńde qaıtalanatyn bolsa, bul EAS bolýy múmkin.
Dáriger sizdi qarap, tekserip, basqa múmkin máselelerdi eskerý úshin keıbir tekserýlerdi ótkizýi múmkin. Sondaı-aq, ol sizben tamaqtanýdaǵy talǵamyńyz, ádetterińiz, jumysyńyz ben otbasyńyz týraly suraıdy.
EAS emdeý tásili joq, biraq, emdám saqtaý, udaıy dene júktemeleri, keıbir dárilik preparattardy qabyldaý sımptomdardy jeńildetýge kómektesedi. Dáriger emdámge jáne jattyǵý baǵdarlamasyna qajetti ózgerister engizý týraly keńes beredi. Qandaı da bir sımptomdar bolýyna jáne olardyń aıqyndylyǵyna baılanysty dáriger sizge dárilik preparattardy taǵaıyndaıdy.
Naqty sizge jaramdy emdeýdi tańdaý úshin sizge birneshe preparat qabyldaý qajet bolýy múmkin. Olar dárigerdiń retseptimen, retseptsiz de bosatylady. Kóbinese, dáriger dıýretıkter, antıdepressanttar jáne uryqtanýǵa qarsy tabletkalardy taǵaıyndaýy múmkin. EAS úshin basqa preparattar qazirgi ýaqytta zerttelý ústinde.
Dıýretıkter organızmge artyq suıyqtyq pen natrııdi shyǵarýǵa kómektesedi. Olar ishtiń kebýin, salmaqqa qatysty máselelerdi, keýde men ishtegi aýyrsynýdy jeńildetýge yqpal etedi. Dıýretıkter ádette, EAS osy sımptomdary paıda bolýynyń aldynda taǵaıyndalady.
Antıdepressanttar kómektese alady ma?
Antıdepressanttar keıbir áıelder sezinetin kúshti ashýshańdyqta, depressııa men úreılenýde kómektesýi múmkin. Bul dárilerdi ádette, kúndelikti qabyldaý qajet.
Uryqtanýǵa qarsy preparattardy qabyldaý kómektesedi me?
Dáriger EAS keıbir sımptomdaryn jeńildetý úshin sizben uryqtanýǵa qarsy tabletkalardy qabyldaý týraly talqylaýy múmkin. Uryqtanýǵa qarsy tabletkalar etekkir aınalymy boıy gormondardyń deńgeıin baqylaýǵa kómektesedi. Olardy qabyldaý kezinde kóptegen áıelder EAS sımptomdarynyń edáýir jeńildeýin baıqaıdy. Degenmen, bul preparattardyń ózindik janama áseri bolýy múmkin.
EAS emdeý úshin qandaı preparattardy retseptsiz satyp alýǵa bolady?
EAS sımptomdaryn basý úshin dárigerdiń retseptisiz bosatylatyn dárilerdi qabyldaýǵa bolady. Bul preparattar - aspırınniń nemese atsetamınofenniń kofeınmen, antıgıstamındik preparattarmen nemese dıýretıktarmen birigýi.
Sondaı-aq, keıbir aýyrsynýdy basatyn preparattar da kómektesedi. Olarǵa steroıdtyq emes qabynýǵa qarsy, aýyrsynýdy basatyn dáriler jatady, mysaly, ıbýprofen, ketoprofen jáne naproksen.
Bul dáriler EAS jeńil nemese ortasha kúıde ótýinde jaqsy kómektesedi. Bul preparattardyń birin qoldanar aldynda dárigermen keńesińiz.
Sımptomdardy qalaı jeńildetýge bolady?
EAS sımptomdaryn baqylaý boıynsha keńesterdi usynamyz.
EAS sımptomdaryn jáne olardyń paıda bolý ýaqytyn bilý sizge ratsıonyńyzdy ózgertýge jáne dene jattyǵýlaryn ár aıǵa josparlaýǵa kómektesedi.
Siz úshin jaramdy preparat tańdaý nemese keńes berý birshama ýaqyt alýy múmkin. Ár adamda emdeý ár túrli bolady. Dárige sizge durys emdeý tańdaýǵa kómektesedi.
· Tamaqqa kúrdeli kómirsýlardy (mysaly, tutas dánder jáne tutas dánnen jasalǵan nan, makaron ónimderi jáne jarmalar), talshyq pen aqýyzdy tutynyńyz. Qantty jáne maıly ónimderdi qabyldaýdy azaıtyńyz.
· Ishtiń kebýin jáne organızmde suıyqtyqtyń irkilýin azaıtý úshin etekkirge deıin birneshe kún buryn tuzdy tutynýdan alshaq bolý qajet.
· Shıryǵýdy, ashýshańdyqty azaıtý, emshektiń aýyrsynýyn jeńildetý úshin kofeın tutynýdy azaıtyńyz.
· Alkogol ishýden alshaq bolyńyz. Etekkir bastalýynyń aldynda alkogol ishý ózińizdi basyńqy sezinýge aparýy múmkin.
· Tamaq ishýdi kúnine 3 ret emes, 6 retke ózgertińiz, jáne az úlespen ishińiz.
· Aerobty jattyǵýlarmen aınalysyńyz. Aptasyna 30 mınýtten, 4-6 ret.
· Kóbirek uıqtańyz (táýligine 8 saǵat).
· Tamaq ishý, uıqy jáne dene jattyǵýlarynyń kestesin quryńyz.
· Kúızelistik oqıǵalardy etekkirden keıingi kelesi aptaǵa josparlap kórińiz.
Dárýmender men taǵamdyq qospalar jóninde ne aıtýǵa bolady?
Dárýmender jáne basqa qospalar, mysaly, V6, E dárýmenderi, magnıı, marganets jáne trıptofan EAS sımptomdaryn jeńildetýi múmkin. Bul emdeý jaıynda kóptegen zertteýler júrgizilgen, jáne olardyń paıdasyna qaraǵanda ákeletin zııany kóptigi anyqtalǵan. Mysaly, V6, E dárýmenderin kóp mólsherde qabyldaǵanda, janama áserleri bolady. Osy dárýmender jáne qospalardy qabyldaý aldynda dárigermen keńesińiz.