Mazmuny
Aýrýdyń paıda bolý sebepteri qandaı?
Jynystyq músheniń qısaıýynda ne isteýge bolady?
Operatıvtik emdeý kómektesedi me?
Peıronı aýrýy – bul jynystyq músheniń qısaıýymen sıpattalatyn aýrý. Keıbir erlerde Peıronı aýrýy jeńil jáne sımptomdarsyz ótedi. Al basqalarda erektsııa kezinde aýyrsynýdyń paıda bolýymen nemese erektsııanyń buzylysymen kórinis beredi.
Erlerdiń reprodýktıvtik júıesine jynystyq múshe, uma, uryqtyq tútikter jáne qýyq asty bezi jatady.
Aýrýdyń paıda bolý sebepteri qandaı?
Jynystyq músheniń qısaıýy penıstiń terisiniń astynda tyrtyqty tinniń qalyptasýynyń saldarynan paıda bolady. Tyrtyqty tinniń paıda bolý sebebi zerttelmegen. Keıbir erlerde ol jynystyq músheniń jaraqatynan keıin ulǵaıa bastaıdy. Tyrtyqty tin teriniń astynan jotalanyp nemese shaǵyn tómpeshikter qatary túrinde shyǵyp turady. Alǵashqy birneshe jyldyń barysynda ol qarqyndy ulǵaıyp, jynystyq músheniń qısaıýynyń kúsheıýine yqpal etedi. Qısaıý erektsııa kezinde asa aıqyn baıqalady. Birneshe jyldan keıin tyrtyqty tinniń ósýi toqtaıdy, biraq, joıylmaıdy.
Jynystyq músheniń qısaıýynda ne isteýge bolady?
Peıronı aýrýy tolyǵymen jazylmaıdy. Keıbir erlerge kalıı amınobenzoaty nemese E dárýmeni sekildi dárilik preparattar kómektesedi. Kalıı amınobenzoatyn emdeýshi dáriger taǵaıyndaıdy, al E dárýmenin dárihanadan retseptisiz satyp alýǵa bolady. E dárýmenin dárigerdiń taǵaıyndaǵan mólsherinen artyq qabyldamańyz. E dárýmeniniń úlken mólsheri aýrýdy jazýǵa kómektespeıdi. Sonymen qatar, kalıı amınobenzoatyn nemese E dárýmenin úlken mólsherde qabyldaý baýyrǵa zııanyn tıgizýi múmkin. Kalıı amınobenzoatyn qabyldaýda júrek aınýy jáne tábetti joǵaltý paıda bolýy múmkin.
Emdeýdiń basqa nusqasy – zaqymdaný oshaǵyna dárilik preparattyń ınektsııasyn salý. Dáriger preparatty tikeleı tyrtyqty tinge engizedi. Ádette, dáriger «verapamıl» dárilik preparatyn engizedi. «Verapamıl» tyrtyqty tinniń buzylýyna yqpal etedi, sondaı-aq, zaqymdanýdyń jańa oshaqtarynyń paıda bolýynyń aldyn alady. Emdeý kýrsy, shamamen, 3 aıǵa sozylady.
Operatıvtik emdeý kómektesedi me?
Hırýrgııalyq emdeý erektıldik qabileti tómendegen jáne erektsııa kezinde aýyrsyný paıda bolatyn erlerge usynylady. Birneshe hırýrgııalyq ádisteme bar. Emdeýdiń bir nusqasy – jynystyq músheni túzetýge arnalǵan arnaıy protezdi qondyrý. Ol sondaı-aq, uzaq ýaqyt boıǵy erektsııany saqtaýǵa kómektesedi. Basqa nusqa – tyrtyqty tindi alyp tastaý. Dáriger naýqasqa hırýrgııalyq emdeýdiń barlyq múmkin nusqalary týraly túsindirip, qaısysy jaramdy ekendigin sheshýge kómektesedi.